کوژرانی هاووڵاتییەکی کورد لە سیلوانا بەدەستی گەشتیارێکی تورک کاردانەوەی زۆری لێکەوتووە، بەشێک لەهاووڵاتیان رەخنەی تووندیان لە بەرپرسان گرتووەو دەڵێن پان تورکەکان بەهەموو شێوەیەک دژایەتی و دوژمنایەتی خۆیان بۆ کوردەکان نیشان دەدەن. بەپێی بەدواداچوونەکانی رۆژهەڵات نیوز، هاووڵاتییەکی کورد بەناوی شەهاب نەعمان زادە خەڵکی سیلوانا لەلایەن چەند گەشتیارێکەوە هێرشی دەکرێتە سەرو بە چەقۆ دەکوژرێت. شایەتحاڵێک بە رۆژهەڵات نیوزی راگەیاند، شەهاب و بڕاکەی لەو ناوچە گەشتیارە کاریان کردووە، ژمارەیەک گەشتیاری بەرەگەز تورک سەرخۆش (مەست) بوونەو دوای بێرێزیکردنێکی زۆر بە شەهاب و بڕاکەی بە چەقۆ پەڵاماریان دەدەن و لەکۆتاییدا شەهاب دەکوژن. کوژرانی شەهاب نەعمان زادە، کاردانەوەی زۆری لە لای کوردەکان و بەتایبەت چاڵاکوانان دروستکردووە. چاڵاکوانێکی مەدەنی شارەکە دەڵێ زێهنییەتی پان تورکی لەورمێ تەنانەت ناوچەی گەشتیاری کوردەکانیشی پێ تەحەمووڵ ناکرێت و، لەکاتێکی ئاوادا بەپاساوی سەرخۆش بوون ژەهری خۆیان دەرێژن. هاوکات چاڵاکوانێکی دیکەش رەخنە لە نوێنەرە کوردەکانی ورمێ لە مەجلیسی ئێران دەگرێت و پێیوایە ئەوان لەئاست سەرەرۆیی تورکەکان لەورمێ بێدەنگن. هەربۆیە داوا دەکەن جگە لە تاوانی ئەنجامدانی قەتڵ لەلایەن ئەو تورکانە، ئەو پەروەندەیە بەشێوەیەکی تایبەتتر مامەڵەی لەگەڵ بکەن. کوژرانی ئەو هاووڵاتییە کوردە لە سیلوانا لەلایەن چەند گەنجێکی تورک لەرۆژێکدا بوو، کە لەهەمان رۆژدا بەرپرسانی پارێزگای ورمێ بەئاڵا و جلوبەرگی حیزبی پان تورک و هێمای تورانییەکان پێشوازیان لە وەزیرێکی کابینەی مەسعوود پزیشکیان کرد، بڵاوبوونەوەی ئەو وێنەیەش کاردانەوەی زۆری لای کوردەکان لێکەوتەوە.
.jpg)
